--------------------------------------------------------------------------------
المقال اللي جاي داه عن ايامي السودة مع المرور
انا ما عملتش الرخصة في 3 ايام
بعد عن تجربتي عرفت ازاي ممكن تتعمل في 3
بدل اسبوعين
فلازم تقري داه كويس
بدل ما تلاقي نفسك تاني يوم في مستشفي المجانين
اولا
و قبل كل شئ داخل المرور لازم تتحلي بالصبر و البرود الشديد و الا هتتشل و ممكن تموت و انت واقف
ثانيا
لازم تكون واقف من الساعه 8 ادام باب المرور لانة بيفتح الساعه 8 و نص و بكده تكون الاول في كل حاجة و تخلص
ثالثا
لو حد فكر يقف ادامك و انت رايح بدري كده ما تترددش انك تمسك في زمارة رقبته لحد ما يفيظ منك
رابعا
لازم يكون معاك فكه كويسة لانك هترشي نص اللي في المرور ما عدا الاتي : مهندس الكشف , موظفة شهادة المخلفات, موظف تسجيل شهادة المخلفات, موظفة التجديد
خامسا
اياك و ابدا انك تقف لحد ينده عليك يقول تعالي و انا اخلصلك العملية لان دول نصابين و مش هيعملوك اي حاجة اكتر من اللي انت بتعمله و هتسني برضوا نفس الانتظار و هتتضرب معلش في الكلمة علي افاك
المرحلة الاولي: المخلفــــــــات
اول حاجة تعملها انك تطلع شهادة المخلفات و تستعد طبعا بانك تحضر الرخصة و البطاقة و لازم تكون الرخصة باسمك لو مش باسمك يكون معاك توكيل رسمي من الشهر العقاري للمرور
في اللحظة دي ممكن:
يا تاخد شهادة براءة زمة و معناه انك ما عملتيش اي مخلفة ( تحدث بنسب ضئيلة لكن لو حصلتلك يبقي حظك نار ) و ساعتها هتمضيها من وكيل النيابة و بعدين تروح تسجلها في وحدة تسجيل المخلفات بالكومبيوتر
و ممكن برضوا للاسف يطلع عليك مخلفات و ساعتها هتروح برضوا تمضيها من وكيل النيابة و انت و نصيبك يا خفضها يا سبها زي ما هيه . و بعدين تروح تدفعها في الخزنة و تروح تجيب الاصول و تاخدها من الملف علشان ما تنزلكش تاني و تروح لشباك شهادات المخلفات تاخد براءة زمة و تروح تمضيها من وكيل النيابة و بعدين تروح تسجلها في وحده التسجيل بالكومبيوتر
معني كده ان الساعه بقت علي الاقل 10 و نص
المرحلة الثانية: التـــــــامين
اي عربية ملاكي عليها تامين اجباري و بيبقي في شركات كتير هناك ممكن تدفع التامين عندها و علي فكرة داه تامين حلسي يعني نصب علي نهب و عديها
و المرحلة دي سهلة المفروض تخلص في اقل من 5 دقايق
المرحلة الثالثة: الدوســـــــية
كالعادة لازم تدفع و تدفع فكده انت بتشتري دوسية من ورق كارتون اصفر معفن ب 8 جنية و نص و معاه طوابع شرطة و ورق فاشلة للتجديد المهم طقم التجديد داه بيتكلف 22 جنية
المرحلة الرابعة: ادفع الضريبة
و دا شباك بيبقي بتاع بريد و ضريبة بتدفع علي حسب السنة و الل cc بتاع العربية واخرك فيها 10 دقايق
المرحلة الخامسة: ورق الكشف
تروح منطقة الكشف و تشتري استمارات كشف بيبقي 3 ورقات ب 10 جنية
المرحلة السادسة: الطفاية
لو طفايتك عمرها اكتر من 5 سنين اعرف انك هتشتري واحده تانية و سعرها بيتراوح من بين 120 ل 125 جنية
بتروح مكتب الكشف علي الطفاية و بتكشف عليها و يختملك الورقة بتاعه الطفاية
المرحلة السابعة: روح بيتكم
عقبال ما تخلص كل المراحل اللي فاتت هتلاقي الساعة واحده او اتنين فلازم ساعتها تروح بيتكم لانهم بيقفلوا الساعه 2 و تاكد تمام انك تغسل العريبة كويس و شحمها كويس جدا جدا و بالذات الماتور و الشاسية من ادام هنعرف بعدين ليه
المرحلة الثامنة: الكشف
زي اول مرحلة هتكون في منطقة الكشف الساعه 8 بالدقيقة هيبتدوا انهم ياخدوا منك الملف و ورقة الكشف و تحط عليها بصمة رقم الماتور و الشاسية علشان كده كان لازم يتغسلوا علشان الارقام تبان
لازم تكون انت اول واحد لاني كل اللي جاه لسة ما كشفش علي الطفاية و بذلك هتخش الفحص اول واحد هتديلة البطاقة و الرخصة و هيكتب شوية حجات في الدوسية و يقولك روح ادفع 10 جنية في مكتب اللوحات هتروح تدفعها و كده يبقي انت خلصت مرحلة الكشف و دلوقتي تاخد الدوسية
المرحلة التاسعة: روح بيتكم تاني
لان ما فيش امل انك تخلص في نفس اليوم المراحل اللي جاة و الا لو معاك وسطة فبذلك مش هتحتاج تقري الموضوع داه من اساسة
المرحلة العاشرة: فك النمر( للنمر القديمة فقط)
لما تروح بيتكم نام و اتغطي كويس و الصبح تقوم بدري و تفك النمر و تربطها بحبل او دوبارة و ما تنساش تاخد معاك مقص او سكنية
المرحلة الحادية عشر: الرخصة
تكون هناك امتي ؟ 8 الصبح كالعادة طبعا و تقطع حبل النمر و تاخدها معاك و تروح لشباك التجديد علي حسب نمرتك كل مجموعة من الارقام ليها شباك( للنمر القديمة فقط) وتروح تشتري ورقتين تسليم لوح و وورقة كمان مش فاكر اسمها اية هو في مرور محرم بك الاسكندرية موجودين في التصوير المهم بعديه لازم تشوف عسكري يعملك حاجة اسمها تنزيل الملف القديم داه اساسي اوعلي تنسي و بعد ما ينزل تدي الموظفة بتاعه التجديد (اللي هترجع في وشك و تحس انها من ايام هتلر او هيه هتلر بس متخفي) الموظفة هتديك ورقة هتروح تدفع بيها 100 جنية داه حق اللوح الجديدة
هتقف تستني لحد ماالروق يتراجع و تمام و هتاخد ورقتين متدبسين في بعض تروح تسلم اللوح في اوضه اللوحات و تطلع للكومبيوتر
هتاخد منك الورق و هتطلعلك رخصة مكتوب فيها رقم من اللوحات الجيدة
المرحلة الاخيرة: تركيب النمر
هتروح وحده الكشف هتلاقي فيها مكتب للنمر الجديدة هتاخد لوحتك و هتسبله الرخصة هتروح تدفع 35 جنية تركيب لوحات و تركبهم و بعدين ترجع تاخد رخصتك و انت كده الحمد لله معاك رخصة.
الف مبروك انت كده قدرت تغلب نظام الحكومة انها تكبتك لحد ما تبقي عامل زي ابراهيم الابيض
ملحوظــــات
-الشنطة و المثلث بيتسلموا مجانا مع التجديد لو الترخيص لاول مره فما تشتريش من برا و كده كده مش هتلاقي فحلني عقبال ما تاخدهم
-في بعض الاحيان بيغتتوا و بيكشفوا علي العادم بتاع العربية و المتور و الدينمو و البطارية فحاول يكونوا دول كويسين و انت رايح
-اياك و ابدا لما تقولك ان الكومبيوتر عطلان تكمل اجارئات و تاخد رخصة مؤقتة اياااااااااااااك لانك لا هتاخد نمر جديد ولا بادج الترخيص اللي بيتحط علي الازاز و بكده كل ضابط في كل لجنة هيوقفك و يلعب بيك شوية
لو يحص كده خد ملفك و امشييييييييي بدون ان تتردد.
__________________